مكتبة الاشعار الشايقية

[سامى]

ضل الغيمة السر عثمان الطيب
ضل الغيمة
***********

ضل الغيمة غش قليبى قال ينجم خت رحالو
فات خلاهو ده الكان ظنو فى عز الهجير يرتالو
*******
عاد ورينى ليه يا غيمة؟ ماك عارفى السفر واحوالو؟
ولاَّ قليبى تحتك حالفي ما يطيبلو المقيل يحلالو ؟
*******
ضلك من بعيد يا غيمة كان دايماً بيتمارالو
جافل منُّو لكن برضو كان عاقد عليهو امالو
*******
جاييك من بعيد يا غيمة قاصدك دار يريِّح بالو
لحظات بس يعيشن هانى تحتك زى عمر تبقالو
*******
فاكرك والهجير يا غيمة صاليهو ومبشتن حالـو
بى تحنان تحضنى عليكى تمسحى منُّو دمعات سالو
******
لو كان ليك قلب يا غيمة عاشقك فات رحلبو وشالو
كان واديكي دمعك رشَّ كترت عربو فى حلاَّلو
*******
ما دام فُـتـِّى آهـ يا غيمة قصدو الدايرو ما تمَّالو
شن الحارسو باقى وراكى ما دام غردو تب ما نالو
*******
بالليل والنهار يا غيمة ناوى يقوم على ترحالو
وحدو خلاص يواصل تانى مشواراً كتيرى اهوالو
*******
قوليلو الوداع يا غيمة لو كان فى الوداع يلقالو
حبة زاد يشيلا معاهو فى سفرو وليالى الطالو
*******
دار يوصيكي ، هاك يا غيمة ، لى زولاً قبيل غنَّالو
تمشيلو وتوصِّفى ليهو كيف جمر الغرام سوَّالو
*******
كيفن بُعدو آهـ يا غيمة تب فى الدنيا ما خلاَّلو
غير جرحاً يزيد ايلامو كلما صحبو قالوا وقالوا
*******
غير بيت من قصيد يا غيمة يفرِح حتى لى عزالو
مهما سوُّوا فوقو وجابو ، زادولو الملامة وكالو
******
غير طيفو الحبيب يا غيمة فى دنيا العذاب هلاَّلو
اتذكر زمانو الولَّى ، رقَّ قليبو تب حنَّالو
********
غير قيداً خلاص يا غيمة معقود وانعدم حلاَّلو
رغم البيهو قولى ليهو ما فارقت لحظة خيالو
***********

[سامى]

السر عثمان الطيب



..مالي البلد ..قالو ا العريس قام بالاحد

الحلي جاطت والحريم يتهامسن ..جاي الولد...

كوم من بنات للبير ورد..يتحدثن..جاي الولد

و بختها..واشوقنا نحنا..الفينا جمر الشوق وقد

كل الحديث الليلي فوق بت البلد .......

لامن خلاص

الليل دخل..وآخر شعاع من الشمس روّح نزل

ضوء القميرة جاء من بعيد... بهّر قدل

دافر ظلام الحلي قدامو ووصل

ناس البلد ..النام رقد ..والماسك السبحه...وعبد

مشغول هو بي خبر العريس ..القالوا قام يوم الاحد

هناك بعيد بي

غادي ..في آخر الديار

راكوبة ضلها أحر من حر النهار

كوم من بروش... وجريد تمر.. عيدان صغار

ودلوق هدوم موروثة ..من زمن الكبار

وثلاث عناقريبا صغار..كرّابا..متقطّع نزل

والنوم من البفوقا روّح تب جفل

راقد هناك كوم من ضياع..مركب مسافري...بلا شراع

أحلام مسافري بلا وداع..ودموع ضياع تتجارى من غير انقطاع

احرف أنين ..ما خطتن ايد بي يراع

ليلا نجومو يودعنو خلاس مسافرات ..هن سراع

لي بت البلد عبراتا سدّت ..في الحلق

تبكي وتنوح ..تشرب دموعا وتنشرق

لمّان حسيس نقاره ..جاها من الشرق

قامت مع الليل صنقرت

وبكت بكت ..شالت طريحتها

للدميعات ..كفكفت

فجأة السنين ..الفاتو ..جن

وأيام زمان اتلملمن.

اتذكرت....

كانت تقوم فجرا صباح

لمّن يقوموا أهل الصلاح

ابوها شايل السبحه..صاح...

يا شافعه..سوّي الشاي سريع..شدّي ..الملاح

شيلي المناجل ..وامشي قدامي...الجرف

اتذكرت ..كانت تسبقو وتمشي تنزل بي تحت

تمسك سبيطة التمرة

بايدها ..وتحت تقعد تحش الوبي للكاويق تقش

تصل البحر ..والموج يداعبا فوق هدوما ..ينط يرش


بعدين... تشيل القش تفوت ..واليوم يفوت..

وتفوت سنين وتمر سنين

يكبر عمير بت البلد ..

ويكبرمعاهو كمان حنين

في يوم صباح وصباح هناء

واحة عبير نغمة غناء

ريحة.. لبيني مقننه

مر الجنا ...وسلّم علي بت البلد

ذي عادتو سلّم... وابتعد

تابعاهو ..عين بت البلد

بت البلد ..سمعت ضريبات القلب

.. يا الله ...مالو ده ها القلب

بعد الثبات كيفن خرب

بت البلد ..عرفت...تحب

اليوما داك بت البلد ما جاها نوم

ما دام خيال ود البلد يمشي...ويحوم

بين الخيال ..شافت وجيهو الهاش وباش

شافت عيونو الفيها فيض احلاما عام

شافت سحاب الريده فوق واديها لان

بت البلد.. تاهت مع الشوق

اللي ما عاد يننكتم

والصورة هادي الفي القليب بتترسم

واسمو العلي نونات خديدها..صبح وسم

تاهت مشت سايقاها دقات الدليب

لدار حبيبا ..ومني ..القليب

لقعدة عصراوية ..فوق العنقريب

للونسي والخاطر يطيب

لمسكة في ايد..الحبيب

الوقفة قدام الجنات

القرمصيص ..وغنا البنات

يا الله ..وين تلقى...الثبات

والصفقة من تالا الولاد

ماب تسمعها ..جاياها ..من آخر..بلاد

بت البلد ..اتذكرت كيف حاج محمد ..والدها

حالف يمين..ود البلد ما..يآخدا


اتذكرت كيف حاج محمد...والدها

قال ليها ما عندك ادب

تعبان سنين فوقك تعب

وادّيك لزولا..كعب

تربال ..وعيشتو عدم عدم

لا قارئ لا ماسك قلم

تاخديهو تندمي صح ندم

يشقيك ..يوريك الالم


اتذكرت كيف حاج محمد...والدها

وصف العريس ..الجاي بقطر الاحد

كتّر محاسنو وعددها...

راجل موظف عندو..مال

يأويك في بيت الحلال

تبقيلو كيف ام العيال

..اتذكرت

لمان ابت قول حاج محمد والدها

كيف نهّرها ..وحالف يمين ..بيودرها

لو ما رضت

يالجاي ..بقطر الاحد

اتذكرت كيف الحبيب ود البلد

في الغربة روح..وابتعد

وبكت بكت بت البلد ..

لما الخبر ذاع في البلد انو العريس قام بي الاحد

الحلي جاطت والحريم يتهامسن جاي الولد

كوم من بنات للبير ورد..يتحدثن..جاي الولد

و بختها..واشوقنا نحنا..الفينا جمر الشوق وقد

لاكنهن ماعرفن الشوق كيف وقد

ماعرفن انو الشوق تما وليه حد

موللعريس للحبيب ودالبلد

الراح في زحمت ضياع وهو ماتوجد

يا حليلك انتي يا بت البلد

ويا حليلك انتي يابت البلد

[سامى]

خالد شقورى
(صبرية)
طفت اطراف الفيافي
شلت صبحي وليلي حافي
مانسيت ارد القوافي
زي طعم صبريه مافي
زي عشم صبريه مافي
زي نغم صبريه مافي
....,,,....
شافعي من عربان بلدنا
منها وفيها الوداعه
شتله في قيزان بلدنا
قايمي بايده وضراعه
القديم اللافه طرقي
زاهي في روعة طباعه
البسيمات في وجيها
الباهي من زمن الرضاعه
فاقعي زي شمس العصاري
في العمر باقي له ساعه
في القليب الشايله صافي
زي صفا صبريه مافي....,,
......,,,,.....
في الهجير راحت تدقق
في النهارالحار تورق
للهدوم بالليل تلتق ....
....,,,....
في الجرف زارعه له حوض
راجي قبل الحين يبتق
والبسالمه من بلدنا
هي تقولو انشالله عافي
زي كلام صبريه مافي
وزي سلام صبريه مافي
في كريقة خاله احمد
شايله ليله وايده تنبح
شوكي لاقته في دريبه
لما كان بالمعز تسرح
نامت المسكيني تقنت
والفوينيس زادو روح
باقي تمتمه في خشيمه
تسال الله المسره تنجح
ماله مال المسره الا
شان حبيب روحه يفرح
....,,,....
دي البنيه الريده وافي
زي غرام صبريه مافي
زي شعور صبريه مافي
زي غرام صبريه مافي
رادت الناس السمر
رادت الصفا والعكر
رادت الموج الهدر
ردات الحله وبيوته...
....,,,,...
في عيون صبريه طلت
ريدة الخلا للبحر
نافري من قيلة الكرارق
وخايفي من قولة السفر
والرحيل السرو خافي
في قلب صبريه مافي
في زمن صبريه مافي
وفي خيال صبريه مافي.....
....,,,....
والنهايه المن فصول
سيرة البنيه
لما عادت للبيوت
الكانو قبل المغربيه
مالقت غير الزوامل
شايله احلام الصبيه
شايلي عيدان الكرراق
في الصباحات والعشيه
ضاربي بطن الوادي
زفه لمت الناس والسعيه
والمطيره الضاربي
قبلي لاقت الدمعه العصيه
....,,,....
والرحيل عز البوداي
الرحيل وجع البنيه
زي رحيل صبريه مافي ِ
زي سفر صبريه مافي
زي حلم صبريه مافي

[سامى]

الشاعر خالد شقوري


يا الشايل شمسك في جواك خليها تبين للناس تطلع
يا النازع فرحة والدة هناك غير حس آهاتك ما بتسمع
******
يا الناسي اللبقة المفتوحة دي بلاك طوريتك ما بتقرع
المنجل في راس التمرة ناسيهو وامك ما بتطلع
الكتقة وقعت والحملان في اللوبي بقت تجري وترتع
والزير الفي بيت الضيفان حرمان لا نزّ ولا نقع
******
يا السبت عقابك وروحت وحيات عز بلدك لا تنجع
الشتلة تقولك لاتنجع الواطة تقولك لا تنجع
الحوض الما رفعت سرابو ينادي يقولك لا تنجع
الحبل الما تميت وسيرو يهاتي يقولك لا تنجع
والنيل الفي واطاتنا ترع بيقولك ازرع ولا تنجع
******
ماك فاكر يوم داير ترحل وابوك الحاج شايلو عصا
لا حيلو وقف طقش الابريق اندفق سال فوق المصلاة
قام بارى الحيطة واتوكل ويقوم فد مرة ومية يقع
ويقولك يا المبروك ارجع
******
ارجع ارجع يا زول ارجع غير ارضك عاد ما بتلقى بطاح
شن داير في بلدا والناس ما فيهن حاس وما فيها صباح
الليل الويل مليان اتراح الويل الليل مليان اتراح
بياع بيقول افراح افراح زي البيقول تفاح تفاح
******
مجلوبة الفرحة ومفروشة من ضحك الناس دايرين ارباح
لو كان في ايدن ملك الكون كان لمّو عبير الزهر الفاح
كان علمو نفس الزول العاش في سدر الليل داير يرتاح
كان حجزوا الغيم في واطاتو وكان آمسكين باعو الارواح
******
وين تلقى الفرحة وتتهنى في دارا ضيقي ومافي براح
جم ناسا من عين العطشان تخطف ومضات البرق اللاح
******
سايب اهلك ونخلك راحل قول وين ماشي وين آ صاح
الشمس النايري ابت تطلع النيل يا زول اصبح رحراح
الضل قصر ما غتى رويس ولدا ساكب عرق الكتاح
الواطة ابت تديك الخير ولا انت عليك ما هابي رياح
******
قولي وين ماشي ووين غاشي ولي شن سايب بلد الصلاح
النسمة ان جاتك بتجيك ملياني عبير عند الفياح
الموية ان داير تلقاها نقاعا واطيب من الراح
ان درت نغيم الموج تلقى وان درت كمان الطير صداح
******
ارجع ارجع يا زول ارجع
الضحكة هناك من جوة الجوف الفرحة هناك ما فيها الخوف
الشقى ارحم في ضل النيم وبعيد من ناسا واقفة صفوف
جم ناس حبان تلقى المكسور مشيول في كتاف واحد مكفوف
الجن الاحمر فاقد الحيل في خلوة حاج الخير مكتوف
دكان الشيخ فوق الواطة كيمان كيمان ما فيهو رفوف

[سامى]

الفاتح ابراهيم بشير
عفواً



انا قلبى شان ينساك دايرلو تانى زمن

عفوا حبيب قلبى ما انت لى وطن
=====
انا قلبى ذنبه شنو عودته انت عليك

علمته يبكى ينوح يوم ما يشوف عينيك

وكتين ملكته خلاص فريتها لجنحيك

خاطبته باستبداد قلت ليه آه كان ليك
=====

هو الصابر المسكين راجى اليالى تروق

لا كلّ لا ملّ لا عاتب المعشوق

كل القدر قالو ياناس كتلنى الشوق

والضقته فى دنياى ما ضاقو قط مخلوق
=====
انا يا خلائق آه ضقت العذاب اصناف

شلت الليالى سقد تشهد تبارك وقاف

جربت صبر ايوب كانت نهايته كفاك

والصابنى يالمريود بالعين محال ينشاف
=====
لو دار تعرف البى ارجوك مرة تعال

اقعد وعاين بس ما تسال اى سؤال

انا يا حليلى انا اصبح يمينى شمال

جوايا عشرة اشياء خلت حياتى محال

حظى التعيس الشوم الغيرة والعزال

ليل الضياع والخوف والحيرة والاهمال

انك تملى معاى و بيناتنا كم اميال

احساسى انى بسيط واحلامى واقفه جبال

صبر اً صبرتو عليك ذكرنى سيدنا بلال

حتى ان سكتّ انا تتكلم الاطلال

وآخر المطاف بالليل سافرت باستعجال

لا طلت بلح الشام لا ضقت راحة البال

======
برضك تقول لى اصبر اتحمل المكتوب

واتعوض الله خلاص انسانى يالمحبوب

خلتنى ذى عصفور هبت عليه هبوب

فنتلو عشو شمال شالت صغاره جنوب

[سامى]

الفاتح ابراهيم بشير
زول في وضوحو بلا الشمس ود حمد احمد يارفاق

من شب قام درفون صغير سوالو جو الناس عرش

يا هو الركيزة الفي الفريق زول حوبة شقيش ما يمش

تلقاهو قدام الرجال حاشاهو كلمتو ما بتطش

من شب قام زولا قنوع ما زك يوم درب القرش
وما شالو حق زول بالغلط وما بيرضي سمعتو تنهبش

في ليلة كان راقد حزين وسارح في الزمن الوحش

كيفن بعد كان حالو زين والسوق مفرهد ومنتعش

مرت عليهو سنين عجاف خلت ضماير الناس تطش

بس فجأة سمع الباب يدق ويا الله قام من الفرش

بي سرو قال إن شاء الله خير واطرافو كلها ترتعش

فتح البوابة بلا نفس وقدامو كان ود الفتح

قال ليهو ادخل قالو لا انا حالي ما داير شرح

قال ليهو جيت والعشم سايقني يا اب رايا سمح

وقفت قصاد بيتي الظروف حلفت يمين ما تزح

البيت معاهو المدرسة خلني بي ايدي ازح

والنخلة هادي قدر تشيل ياخدوهو قبال يصطبح

قال ليهو بس نقع البنوك سلفية والحال ينصلح

قلبة وقلبتين يا رفيق وبعدين نشيل نحن الربح

يا إمة نقع الفتل ما الدنيا اصلو فرندقس

يوم انت طاير في السماء ويوم تحبو في جمر الفلس

بس قوي قلبك يا رفيق ونضمك يكون عجوة محس

من بعدو كان درت النجوم تلقاها في شهقة نفس

قبال كمان تصحى الشمس مشى للخزين ود العوض

قال ليهو إلا تمشي معاي اولادي ديك اكلو القرض

اتماسكو الاتنين سوا ودحمد احمد داير يطير

مرات يجك ومرات يخب ومرات تحسبو زي عزير

بس فجاء في لمح البصر لقى نفسو قدام المدير

نفذلهم كل الشروط وفيهم شرط قاسي وعسير

كان الشرط إيه الضمان ما البنك منهجو برمكي

صاحبنا قام رهن الارض الشاربة من دمو الزكي

مداهو معنى الانتماء والضحكة في الزمن البكي

ذرات ترابة تقولو لا والدنيا غرقت في البكى

وين تاني تلقالك حضن ياويك وكتين تشتكي

مين السواي البفهمك يا حمد احمد غير حكي

انا ياني امك يا جناي من قمت زي تمر الفكي

يومو اليشيل فوقك تعب لا بد فوق انا تتكي

لا بد ترجع لي صاد لو حتى في اخر العمر

ربيت اعمامك وابوك وما احتاجو لاعند القبر

يا ابني لا ترهني هو يا ابني عضي الصبر

ود حمد احمد بي اختصار خلط البيصلح بالبضر

ما همو ايه باكر يكون ما طالا حقق للغرض

شال القريشات وانطلق وفي جيبو شيك سمو السند

مبسوط ويضحك منشي وصاحبك يخوجل في البلد

اولادو دايرين يابا جيب صاحبنا يدي بلا عدد

البت تجيهو المدرسة صاحبنا يدي بلا عدد

الحاجة همها توب سمح صاحبنا يدي بلا عدد

لامن شهور الجن مضن لقى نفسو مخنوق بالمسد

الشيكا باقي وقيتا جا اقصاهو لا يوم الاحد

ودحمد احمد انضرب بقى يجري زي القنقرد

مرات يفوتك في السلام مرات يسوى بكى وحرد

بس فجاة صاحبك اختفى همل عقابتو وشرد

ما راعي احساس الورا وما راعي لى البت والولد

ولي زوجتو الممكن تضيع في زحمة الزمن النكد

[سامى]

حاتم حسن الدابى
مرتاح من هموم الدنيا ما ضاقت سهر عينيك
يا طير وا حلالى عليك

صباحات الله ليك بشوشه بتقضيها فوق جنحيك
تتحدى الجبال ووحوشه عارفه ما بتطول عاليك
تلقى اللينى والكرموشه رزقك ما فى زول يحميك
توصله لى جناك مفقوشه متطامن هى بتكفيك
لا مال لا بيوت مفروشه نعم الزايلة ما بتغريك
لا زينة الدهب وكشكوشه لا شققا تكوس تمليك
محل ما تمت المخموشه اجلك فيها بيلاقيك
ماك تتملى فى المغشوشه خلقه الله ياها حليك
وماك عاشق المتكى رموشة شان تختاره ليك شريكه
لا زفة عرس لا هوشه من عندو الكريم يهديك
التلقاها صالحى تنوشه شيلته وكتى ليك تحيكه
واسرابك توقف بوشه ترقصلو الغصون شاديك
ما جبت العروس فى الكوشه واتبسمته فوق كرسيك
ما جيت حنتك منقوشه راسمه والله انسان توقل يديك
فنادقك رحبه واسع حوشه فى ضل دوحة واللا اريكه
لاك سيد تمرتا محشوشه تحرسه والله تمسك شيكه
لا ارضك متكى عيوشه تسند من تقاقه الريكه
لا قفة خضار مطقوشه يومى على الله واجبى عليك
لا التلقاها ناوى تحوشه قبلان بى المن الله يجيك
تدى اطفالك الدروشه مونة بكرة ما بتعنيك
جنياتك ملازمى عشوشه ما لاحت كتب فى وشيك
لا هم الدروس وجيوشه فى يوم عكرت صافيك
لا كتب الفصول وبروشه لا كراس ولا استيكه
ماك ذى ناس ملانى كروشه همها فى القمح والويكه
بالليل والنهار منفوشه طمعانى وتفكر فيك
بى اكل اللحوم مدووشه من دون سبه بتعاديك
فاتحى عليك فاه خرطوشه عيشه حدو لمته فيك

[سامى]

الرواسي
شعر: حاتم حسن الدابي اداء: جعفر السقيد

بدر مدر يا رواسي نحن بعاد لحقنا القيفة
انت مدبج ونحن نقاسى فى برد امشير والموج والزيفة
مركبك الماليها مطارق تمشي تقيف تسرح بى كيفه
مرة مغارب ومرة مشارق وانت تخاف الريح وحفيفه
ساوها زينة وفوقها بيارق وانت مدبج توب وقطيفة
فيها المات والضاربه الفالق والسلمين فى حالة مخيفة
كل الناس ترزح في كفة وانت وناسك فوق الدفة
الدايشين والراسهم لفة والشاخصين فى المدى للضفة
صوف افضالك فوقهم جوة فوق الموية وريقهم جفة
من العطش النص اتوفى وباقى النص الفضل جيفة
....
ضاقوا المر والحال استعصى الشغال واللاحق الحصة
الواصال للرحم اتقصة والهداي مو لاقى الفرصة
الرساي سافر ما وصى خلى محمد واحمد وحفصة
الاطفال العرفو القصة سدت جوة حلوقهم غصة
من الجوع الدم اتمصة واصبح كل الحلم رغيفة
.....
كل الراكب شاف احلامه دون احساس ماتت قدامه
فنُ كتابه وكسر اقلامه لا الوالدين لا جار ما لامه
ناس الحلة القعدوا وقاموا اصر والح يمشى كلامه
هزموهو اخوانه البى الجوع نامو وكم خريج ما لاقى وظيفة
.......
يا الفكيتها وقلت لها سيرى وعارف انه الدنيا دميرى
لا فى ضفاف لا شفنا جزيرى لا فى الحيرى ولا في الطيرى
كسرت جناحها وقلت لها طيرى اتملكت الكانت ميرى
يا السودت الناصع وجيرى ايد الحق صابونى وليفة
......
قبلك كم متعلم وقاري عكس الريح فكولو الصارى
مشدوهين متعشى وحارى ريسها شلته والبحارى
كم سنوات علام البارى واقفى وهم شايفنها جارى
بقينا هلاك والقيف متضارى لا حجار لا دوحة وريفة
.....
حسك عينك ما تتمادى وتنسى الراكب عنده ارادة
الاهوال الشافها وخاضها كان فى مدرسة والا عيادة
شفنا الايد الكان اجوادة يا مبتورة يا شحادة
وياما رقاب كانت سدادة علمت الله من التعريفة
......
يا ريسنا قدر مديرك فك الدفة وادها غيرك
احفظ نفسك ترضى ضميرك وقف اوع تواصل سيرك
كان طاوعتنى شن بيضيرك عرض اكتافك وفك البيرك
لا هنى شكرا وكتر خيرك وكل انسان في الارض خليفة